韓式炒年糕

我本身其實好為食....但識得食,都會識得煮嘅
因為有時對食有要求 (唔過份但都會有..)
好似蕃薯糖水, 我要勁薑...街外都得個甜味...
薯仔炆雞翼, 我要薯蓉...但偏偏我媽媽N年薯仔都無煮到有薯蓉
話懂得煮到好叻好勁, 又不是囉...只為乎合個人口味, 我都會去煮
有時見到食譜, 貪得意為食都會找機會去試煮

相對薯生屋企十年如一日的菜, 自身對食無要求
每次我煮的菜式都會令他驚嘆萬分, 神乎奇技!!
無論味道如何都會附上個大大笑容, 兼全部一掃而空
相信各位家庭煮婦見到都會好開心, 包括我媽媽!
(班不肖女整日挑三挑四, 相對這個樣樣讚好加三碗白飯的大飯薯, 飯桌上哪個較受歡迎?)

今次這個「韓式炒年糕」其實無甚難度
大家去吉朱島凍櫃, 就會見到一包韓式年糕連韓式醬的套裝
但我就再自行加料做成一大鍋「韓式泡菜豬肉片燴年糕」
好似好~~~厲害, 但和打邊爐級數相當...



材料:
年糕      -  1大包
年糕醬    -  1包
韓式泡菜  -  1包
豬肉片 -  隨意自已想加多少
蘿白   -  用約半條
洋葱   -  半個,切絲
指天椒 -  1隻 (隨意加, 我喜歡辣)

做法:
1.首先把年糕按包裝指示的時間用熱水煮軟
2.蘿白切薄片, 用年糕餘下的水再稍為煮軟。
3.在煲內加油, 油滾加入洋葱絲爆香。加入豬肉片略煎後,要先把豬肉片取起。
4.洋葱煲內加入蘿白片/ 年糕/ 指天椒 , 倒入年糕醬及韓式泡菜
   我會在包裝袋內加入少許水,把餘下的醬汁及泡菜汁都混好再加入煲內。
5.醬汁煮滾後, 再加入豬肉片略煮, 即成!



P.S.
1.其實年糕一整包都好多..夠4人份當主食計, 如果當一個菜,以上全部可以減半。
2.蘿白我覺得加了效果不錯, 因為汁味濃,泡菜帶點酸辣,年糕滯, 加了可以中和一下。
  蘿白片,我切約5MM厚, 但你想做條/片/粒都OK。
  不過其他菜也可以, 如黃芽白之類。按你喜愛
3.最後可以再試味,不夠辣,可以略加辣椒粉 , 或者七味粉也可以。
4.現成醬汁有時味道未必符合你口味,可以自行調節。泡菜過酸,亦可以稍為加少許糖調味。