懶人肉醬意粉

每次返屋企, 必定會經過一間專賣西式快餐的EURO狗狗
門口那陣濃濃的芝士、肉醬味經常令我口水分泌增加
但平時因為回家就吃媽媽飯了, 所以不會動手去煮
適逢今日星期六, 返完半DAY放工又聞到陣陣香...
隔著玻璃看到食客大大碟意粉實在按捺不住!!!!!!
立即閃去supermarket買材料

傳統的肉醬需要買一大罐碎蕃茄、茄醬、牛肉湯、加月桂葉煮一輪才可以食
但我又唔想用現成的肉醬汁...食過覺得蕃茄醬陣味怪怪地..
我決定要煮一個快、靚、正的肉醬!! 要半小時內就開餐.....

原來超市無免治牛肉賣..不知是牛肉太貴, 還是少人用碎牛呢.....
但肉醬無牛怎成事呢!!
為彌補呢陣牛味, 我決定改用鹹牛肉罐頭, 即是早餐蛋牛治用那款!


****************我是懶人分隔線*********************



2人份量
(講明懶人食譜...份量都好隨意)

材料:
意粉     - 適量 (看你2人需食多少啦..)
免治豬肉 - 我用上1個飯碗,壓平計的份量
鹹牛肉   - 細圓罐裝170g
蕃茄     - 2-3個
洋葱     - 半個 (家中沒有洋葱, 我用紅葱頭7-8瓣代替)

醃料: 鹽、胡椒粉適量

醬料:
意粉水   - 1湯碗
雞粉     - 1茶匙
糖        - 1小茶匙
茄汁     - 2-3湯匙 (Chok樽 2下)
萬用香草 - 1湯匙   (Chok樽 3-4下)
黑胡椒碎 - 1小茶匙 (我用即磨扭樽 2-3下)
tobasco  - 5-6滴   (其實煮好, 無feel到辣味...可以食時才加)

煮法:
1. 免治豬肉先用鹽、胡椒粉醃一下

2. 把蕃茄在底部用刀劃十字, 水滾加鹽和油後, 把蕃茄和意粉加入, 蕃茄略烚看到皮離開可取出去皮。
意粉按要求減少2分鐘煮, 煮好後過冷河備用。意粉水備起一湯碗。

3. 蕃茄去皮切粒、洋葱切碎粒。

4. 鑊燒紅, 加適量橄欖油, 油熱先落洋葱, 炒至有香味, 落免治豬肉。
   豬肉用中火炒至7成左右, 轉慢火加入免治牛肉, 略把肉拌均勻。
   可加蕃茄碎及上述醬料, 略把醬料拌一下後, 就轉中火略煮醬料1-2分鐘後, 可先試味。
 
5. 如醬汁味道OK, 可以把意粉醬料中, 煮餘下的2分鐘。其中1分鐘最好加蓋煮。

P.S.
 - 萬用香草我是買註明"All purpose"的混合香草, 家中常備一樽實在不錯!
   煮意粉、焗雞、煎魚柳, 一加上香草, 立即對味!!
   當你煮這個肉醬時,一落入香草, 就會立即Feel到肉醬意粉味, 很神奇~

 - 煮醬的時候, 建議可分次加水, 調節自己喜愛的稠度。
   始終我家的湯碗跟你家的湯碗有很大分別嘛......

 - 如家中有片裝芝士, 可以在加蓋煮意粉時, 落1-2片, 待芝士溶後再拌勻。
   當然落芝士粉也可以。

 - 其實那個鹹牛肉加上水煮, 已經變成一個很濃的肉醬。而且用意粉水本身有些鹹味。
   可以不加雞粉, 看你試味後再適當調味。

 - 如果一個人吃, 可留一半放涼後放入雪櫃。
   只需翻熱的時候, 再加一點水再煮, 變回醬狀。

其實整件事好簡單, 我只去買了免治豬肉及罐頭鹹牛肉
配上家中常備的蕃茄、紅葱頭及調味料。
如換上天使粉, 時間可以短一點.....

還有一個 懶人TIPS 是.....
我由煮粉至煮醬都用上同一個中式鑊, 懶得洗多個煲
用中式鑊煮意粉, 水量可減少, 滾水時間都快過人...(果然很懶........)
意粉時就算加蓋煮, 因為空間足夠, 水不滿, 也很少有煲瀉的情況出現..
只要落意粉時, 用筷子撥一下意粉, 用熱水把意粉全都弄軟就可以加蓋煮
那就算水較少都可以煮到意粉...


顏色因為蕃茄較為橙色, 又沒加茄膏,
所以看起來沒有一般肉醬的鮮紅色不過味道卻很好!!
第一次配上鹹牛肉, 成事後出奇地好味....
30分鐘內食到一份滿足午餐! 好幸福~~~~~